- يقولون ليش عندنا الرياضة ماتتطور ؟ .. وانا اقول اشلون تبونها تتطور واغلب الاتحادات ماعندها ملاعب تخصها ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور وثلاث ارباع الاندية منشأتها ناقصه او ماعندها منشأه ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور والمنافسة صارت حكر على فريقين والباقي كومبارس يكملون العدد ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور واستاد الامير جابر رحمه الله له عشر سنين وحنا ناطرين افتتاحه!.
- يقولون ليش عندنا الرياضة ماتتطور ؟ .. وانا اقول اشلون تبونها تتطور والاحتراف الجزئي موجود ؟ .
- يقولون ليش عندنا الرياضة ماتتطور ؟ .. وانا اقول اشلون تبونها تتطور وبعض الاندية فيها ضعاف نفوس مسجلينهم محترفين وهم فوق السن المسموح للرياضي ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور وانتخابات الاندية صارت للي يسجل اكثر من غيره  يعني على راي المثل اللي يقول عد رجالك وورد الماء ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور والاتحادات الرياضية مناصبها مثل الكيكة اللي متقاسمينها اهلها! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور والمدربين الاجانب مانتعب عليهم كل اللي علينا ندفع له اكثر ونهربه من نادية الاصلي بالموسم الثاني ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور واللاعبين الاجانب اللي عندنا ماركة ابو ربع دينار .. لا ومن نادي لنادي لين تنتهي صلاحيته ويشتغل مترجم للاعبين الجدد .
- يقولون ليش عندنا الرياضة ماتتطور ؟ .. وانا اقول اشلون تبونها تتطور والحكومة بارك الله فيها حاطه لها وزارة شباب تتفرج حالها حالنا على الهيئة اللي تدير الرياضة على المزاج ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور و عباقرة اتحاد الكرة تسوي دورات للمنتخب مع افغانستان وقرغستان ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور والاعلام الرياضي متخلف عن الركب الخليجي بمئات السنين بكل شي  ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور والمطبله وبلاعة البيزه اكثر من الهم على القلب ! .
- يقولون ليش عندنا الرياضة ماتتطور ؟ .. وانا اقول اشلون تبونها تتطور .. تدرون اشلون راح اكتفي بهذا لضيق المساحة واللا القصيده اطول من ذلك ! .
ألووو اخير : الحياه مثل السوبر ماركت تتجول فيه وتاخذ ما يطيب لك من المعروض ولكن تذكر بأن الحساب امامك وستدفع ثمن كل شئ اخذته ! .

محمد خلف الشمري

aloooyaomm@hotmail.com