الله من دبلت الجبد حنا ومبارياتنا المحلية بالدوري الكويتي لابارك الله بالتشفير اللي حدنا عليها !.. بعيد الشر عنكم مباريات المحلية (اسم على مسمى ) مالها لا لون ولا طعم مانشوف فيها غير طيخ طاخ باغلب اذا مو كل المباريات !.. وين ووين نشوف مباراة نستمتع فيها وهذي للأسف يمكن مباراة او ثنتين بالموسم !.. لان الأغلبية مانشوف فيها غير اللعب التعاوني واللعب السلبى اللهم يا كافي ثلاث اربع نقلات ماتشوفها !.. ومع كل هالعك الكروي الماسخ اللي يجيب كل انواع الأمراض يطّلع لك معلق يقول قاعدين نشوف اجمل العطاءات واحلى اللقطات مادري هو وش يشوف ؟!.. اعزائي مباريات لا حول ولا قوة الا بالله اكثر مانسمع فيها تصفير الحكم على كل لعبه وكل صفارة أقوي من اللي قبلها !.. وعشان جذا راح افتح باب الرهن للي يتحدي بغير هالكلام !.. اعزائي الأفاضل لعب والله العظيم يفشل من كل اللي موجودين بالملعب من لاعبين محليين ولاعبين اجانب كلهم بالهوا سوا مايعرفون يلعبون ! .. وفوق كل هالعك تلقى المباراة منقولة فضائيا ولها أستديو تحليلي بمقدم ومعلق ومحللين ومرات معاهم حكم سابق على شنو مادري ؟.. وعلى طاري التحليل خلونا نعرج عليهم شوي لانه شي عجيب ومحصلشى الله لايبلانا حاجه ترفع وتخفض الضغطك خصوصا ان تفتق المحلل وقال بان المباراة فيها تكتيك وخطط وبصمات واضحه للمدربين اشلون ؟!.. الله اعلم معقولة هالمباراة المملة اللي تجيب الغثيان والدوخة والمصران الأعور فيها كل هالشي اللي يسولف عنه الحبيب ؟!.. يابن الحلال اللي نشوفه باصات مقطوعه من الكل بلا فنيات ولا جماليات جن الكرة ذابحه واحد من أهله !.. هذا غير حراس المرمي اللي اول ماتوصله الكرة انبطح عليها جنه متحضن ملكة جمال البرازيل !.. ياجماعة الخير اللي نشوفه بدورينا من عك كروي ماله وجود بأندية ودوريات الدرجه الثانية الخليجية أنتم وشتقولون ؟!.. واللي يرحم والديكم راعوا مشاعرنا ترا حنا نفهم الزين (اللي هناك ) والشين (اللي عندنا ) يكفينا غصات وحسرات وألم بقلوبنا !.. والله يا احباب المستوى سئ سئ قاصين على أعماركم بذمتكم اللي ينلعب بملعبنا له علاقة بكرة القدم ؟!.. ماكو رفعه صح وماكو باصات سليمة ماكو بناء هجمة ماكو تشتيت مثل العالم ماكو مهارات وماكو أرضيات مثل أرضيات دول الخليج اللي قريبه منا !.. وفوق كل هالعك لا انتشار ولا تمركز صحيح مثل الناس هم وين وأساسيات الكرة وين ؟!.. لا ويتعازمون على الكرة !.. وليتها جت عليهم حتى المحترفين اكل وشرب الدهر عليهم وخير دليل أسعارهم ولفتهم بين انديتنا بعضهم لعب لاربع أندية !.. والله ملل وقمة الملل فرق بصراحة تنفر وتطفش الجماهير من حضور المباريات ! .. ما أقول الا الله المستعان وياليت لو الزمان يسمح جان عرضت روحي أنا وكم مكرش اعرفهم على واحد من هالنوادي ببلاش على الأقل نعرف نرفع و نعرف نشوت فاولات و نعرف نستلم و نغار على شعار (اهم شي ) الفريق اللي نلعب له .. وبالختام عندي فكرة للقائمين على الأندية ياليت تستغنون عن أشباه المحترفين ومعاريين الأندية وتعتمدون على شباب أنديتكم أبرك !.. على أمل يطّلع لنا شي كان مغمور بالتجاهل المستمر لابناء أنديتكم وسلامتكم .