بعيدا عن السجالات الرياضية المعتادة ولمواكبة الدريبي المرتقب بين الهلال والنصر في الجولة العاشرة من دوري جميل للمحترفين التقى الشاعرين سليمان الشدوي ونايف الجهني في حوار شعري بهذه المناسبة حيث تدور المحاورة الشعرية حول المواجهة المنتظرة الناديين العاصميين لتلطيف الاجواء و مزج الشعر بالرياضة حيث بدأت لمحاورة من الطائف فيما كان الرد من المدينة المنورة :
سليمان الشدوي:
مرحبا بالشاعر/ اللي ما يجيب إلا الغوالي
شاعر وناقد صحافة كفو / وأخلاقه كريمة
جيت يا نايف /وانا بنشدك واعيد السوالي
ليه مفهوم (النصر)أصبح مرادف للهزيمة
نايف الجهني
ياهلا ياشاعر الجمهور الازرق/ ياهلالي
والثنا والشكر/للخلاق / والدعوة كريمة
النصر مطلب ومكسب/ دوم في روس العلالي
والمعاني من صميم المجد /وجروحـًً قديمه
سليمان الشدوي
الزمان اللي مضى لك /والزمان اللي مضى لي
خلنا نحسب محاصيل الخساير/ والغنيمة
يوم قلت العالمية /مهرها من راس مالي
ليه يانايف رميت الروح في بحر الظليمة..!
نايف الجهني
لو حسبناها بميزان العدل / والمجد غالي
ما بقى غير الحتات ..وكلها من دون قيمة..!
يوم رحنا العالمية / نوّرت كل الليالي
ما انلغت من قل مال / ولا حسبناها شتيمة
سليمان الشدوي
الزعيم اللي يطول الطايلات من الطوالي
بالبطولات الهلالية / ومقياس العزيمة
ان بدينا بالملاعب/ مالكم معنا مجالي
وان بديتوا بالمكاتب /صار شي الله عليمه..!
نايف الجهني
الملاعب والمكاتب / للنجوم وللرجالي
ومجدنا سيرة نظيفة / بالبطولات العظيمة
اقتنع باللي خذيته واسترح ما انت بمثالي
العلاقة بينك وبين الحكم جداً حميمة..!
سليمان الشدوي
باكر نوريكم الأبداع / واللعب الخيالي
في كتيبة سامي الجابر / والاحرار العديمة
الحكم باكر خواجه / مايحب الإنفعالي
لو يوجه له حسين الأمر / يعطيه القسيمة..!
نايف الجهني
هازمينك يالهلالي/ حتى لو ألعب لحالي
الخسارة واقعه مُرة / وذكراها اليمة
سامي وياسر ويوسف/ والقدامى والتوالي
مالهم حيله بفارس / له على الامجاد شيمه
سليمان الشدوي
لاجل جمهور النصر / التذكرة / عشرة ريالي
نص شوط / ويضربون الباب / من جور الهزيمة..!
علم الاعلام الأصفر لايكثر قيل قالي
كيف يتجرا ويجرح / نادي القرن وزعيمه
نايف الجهني
يوم نعطيكم من (شهاب الحقيقة) جمر صالي
ماجرحنا (إحساس مرهف) يشبه احساس اليتيمة
لاحضرنا بالملاعب /صار نص الكون خالي
ناس تطرد في سراب /وناس تسرح في بهيمة
سليمان الشدوي
اليتيمة عايشة من غير (رمز )/وغير والي
بعد موت (الرمز) مقهورة وفي حالة سقيمة ..!
تحلمون بحلم /ياخذكم للايام الخوالي
واكثر الاحلام / ودتكم للأفكار العقيمة..!
نايف الجهني
كل شي ً يشترى بالمال / قابل للزوالي
وكل مايل ماتعدله / الخطوط المستقيمة
مشكلتكم ياصديقي/ عايشين ببرج عالي
والحقيقة اسيا (صعبة ) وعلة مستديمة
