الزعامة ما تبي نوم !

محمد الشمريالله يعين ويصبر جماهير نادي القادسية على إدارة ناديهم !.. الفرق المنافسة بعد خسارتهم بطولة الدوري اخذوا يعدون فرقهم بمدربين ومحترفين جدد لتطوير مستوي فرقهم لمزاحمة ومنافسة الزعيم على لقب الدوري الذي يملك رقمه القياسي .. والزعيم ادارته مكبره المخده جن الامر مايهمها وجنها اكتفت باسم الزعامة وبس ؟.. الزعامة يا ناس تبي شغل مو نوم تبي تطعيم نواقص الفريق بالمحترفين المتميزين اللي طلبهم المدرب حتى يرتفع اسم القادسية اكثر وأكثر وخصوصا بعد ان اصبح الزعيم الملكي الأوحد بالكرة الكويتية .. وعلى ما اعتقد كل شي يهون لأجل اسم القادسية حتى لو اضطررتوا للتسلف ان ما كان عندكم لان كرسي المنصب بالقادسية غالي وماهو شي عادي .. واتركوا عنكم التروج باخبار تحاولون من خلالها فرض سياسة الترشيد في الإنفاق في رحلة اعداد الفريق للموسم القادم .. وقال ايـــه حجتهم بذلك هو الأزمة المالية التي يعاني منها النادي والتي بحسب كلامهم انها تسببت في تأخير صرف رواتب العديد من العاملين وأعضاء الأجهزة الفنية والإدارية .. والله شي غريب يا كباتن شنهو الجديد بالموضوع ؟.. ماالحال من بعضه بكل أندية الكويت وكلهم بالهواء سواء لأنهم يعانون من نفس المشكلة يعني السالفة ماهي حصرية .. ياسادة الزعامة تركه ثقيلة واللي ماهو قَدْ حملها ليته ياخذها من قاصرها وينسحب عشان يفتح المجال لغيره عنده الاستعداد للدفع حاله حال أعضاء الأندية المنافسة اللي ماهم مقصرين مع فرقهم والكل بالكويت يشهد على ذلك .. واكبر دليل جلبهم للمدربين وللاعبين المحترفين على مدار الموسم لمواصلة التنافس لاخر بطولة .. يعني المنافسين ماهم حاطين ايدينهم ينتظرون اعانة الهيئة مثل حضراتكم .. هذا للعلم ولكم الامر بماترونه مناسبا لكم ولاسم الزعيم وسلامتكم .
الووو اخير : المحمول على ظهر غيره .. ما يقدر مدى بعد القرية .

التعليقات

1 تعليق
  1. الواقع المر
    1

    صح النوم

    Thumb up 0 Thumb down 1
    22 مايو, 2016 الساعة : 9:25 م
108