#راح_ندفع

محمد الشمريالووو يا ادارة نادي القادسية الكويتي هل عندكم خبر بان جماهير ناديكم قد نفذ رصيد الصبر لديها من اوضاع النادي المزرية وأنتم مو فيه ليش منخشين ؟.. ليش ما تواجهونهم ؟ .. مسانده وساندوكم .. تشجيع وشجعوكم .. نقد وانتقدوكم .. استقالة وطالبوكم .. واعتصامات واعتصموا .. ووضعكم على ماهو عليه لا أنتم قادرين تمشون أمور النادي ولا أنتم معطين مجال حق غيركم يشتغل .. النادي كل ماله بالنازل يوم وراء يوم ولعلمكم الجماهير عندهم خبر ان البعض منكم مكبر وسادته والبعض مجتهد ويدفع وماهو ملحق .. لان ما باليد حيله ومثل ماتعرفون ان اليد الوحدة ماتصفق في ظل التكاسل والاختلافات الواضحه بينكم .. لان أنتم للأسف مو على قلب واحد على الرغم دخولكم بكرت واحد بالانتخابات .. وعلى هالكم الكبير من المشاكل تزعلون اذا احد وصف إدارتكم بالفشل والله حيرتوا الجماهير بأمركم أنتم وشتبون بالضبط ؟. . ادري ما راح يرد احد لذا أنا اجاوب عنكم اللي تبونه هو برد القاع والدعاء ان الله يفرجها لكم ويجملها بالستر لان ما همكم سمعة النادي ولا حرقة قلب جماهيره اللي مستحمله تردي مستوي جميع فرق النادي واولها اللعبة الشعبية الأولي بالعالم .. ومن منطق حبهم لكرة ناديهم اطلق المشجعين بمنتدي رابطة الجمهور القدساوي هاشتاغ كسر الدنيا خلال ساعات وأظهر المعدن النفيس لجماهير القلعة الصفراء أسموه راح ندفع وهدفهم الرئيسي تجميع رواتب المحترفين المتأخرة بعد عجز الادارة عن تسديدها .. بموقف تاريخي كله حب ووفاء يسجل لجماهير النادي من اجل إنقاذ تاريخ وسمعة ناديهم الكروية .. والمتابع لهذا الهشتاق يشوف بعيونه تسابق القدساوية على شراء تذاكر المباريات حفاظا على محترفين النادي ومحاولة إقناعهم بعدم الرحيل وتقديم الشكوي للفيفا .. لأنهم عارفين ان سكت الفيفا طويلة واللي يدخلها يمكن مايسلم ولهذا بدؤو العمل بجد لتغطية عجز وضعف وفشل مجلس إدارة ناديهم اللي للحين جالسين بكراسيهم مادري هم وش ناطرين ؟.. وقبل الختام والسلام خلوني أقول لجماهير بني قادس طز بشنب رجال ما يفتخر فيكم ياعز وفخر ناديكم وراح ندفع لعيون الأصفر الملكي .

الووو اخير : الشكر لله ومن ثم للجمهور الوفي المخلص لنادية .. ربي يحفظكم فعلا صدق من قال ما يطيح نادي هذا جمهوره .

103