احبال تطير .. قراطيس !! .

محمد الشمريأن تصل متأخرا خير من أن لا تصل أبدا .. مصطلح مروري الهدف منه حث السواق على التروي بالسواقة وعدم الاستعجال .. ويعتبر مصطلح تخريع للسواق الطائشين بتذكيرهم بعواقب العجله .. ومصطلح المرور اقتبسته مشكوره الهيئة العامة للرياضة .. بشكواها الى النائب العام استنادا إلى تقريري لجنة حماية المال العام .. وديوان المحاسبة اللذين تضمنا ملاحظات وتجاوزات في دورة كأس الخليج السادسة عشرة لكرة القدم (2003 ) .. وقالت الهيئة في بيانها كما انقله لحضراتكم بالنص حرف حرف إن «هذه الشكوى تأتي ترسيخا لمبادئ سيادة القانون وتطبيقه والمحافظة على المال العام وحرمته من دون الالتفات إلى أي اعتبارات كانت ، ولإيمانها التام بتغليب المصلحة الوطنية » .. لمراد !.. ما اطولها عليكم !.. (تخيلوا ابراهيم الصلال وهو يروي سالفة بنت الخباز ) انشقت القاع .. اضلمت الدنيا .. اختفت الكون .. شجر يمشي .. حصى !!.. احبال تطير .. قراطيس .. اثل .. اشوي والا اغبره !!.. اشوي والا مطر !.. اشوي والا بردي !!! .. اش صاير .. هههههههههه !! الشكوي جااايه الشكوي جااايه ! .. اخيرا و بعد 12 سنه بالتمام والكمال يا محفوظ السلامة انت وهو ياللي تقرون الهيئة قدمت شكواي ؟ .. وش خباري ليش مستعجلين ؟ .. لايكون سامعين ان ساحر مسلسل الاقدار جاي ؟ .. افيدونا افادكم الله على الاقل نتحصن قبل فوات الاوان !.. بالله عليكم وش العجب (مريت) وين كنتوا كل هالسنين وش اللي مصبركم على كل هالتجاوزات الكبيرة دامكم تخافون على المال العام وحرمته من دون الالتفات الي اي اعتبارات كانت ؟ .. والله فشله شهو انشقت الطوفه وخلتكم تشتكون بعد 12 سنه (حلوه ياجميل) ! .. ودام يا اهل الهيئة اشتكيتوا كان من الاولي تطبقون المثل اللي يقول الخير يخص والشر يعم .. جان خليتوها على كل المسئولين اللي لهم علاقة بالموضوع من اس حاليين وسابقين بمعني ان كل اللي تعاقبوا على الهيئة من ساعة هالحدث ليوم طقت مطر الشكوى .. حتي تتجنبون قيل وقال هذا اشتكو عليه وذاك اتركوه .. وبهالطريقة تكونون سكرتوا الباب على جميع الحلوج واخرستوا الكل وتكونون اوصلتوا رساله مفادها ان اللي عاوز يلعب بمكتسبات الشباب والرياضة ماله مكان بمستقبل الايام .. هذا ان كانت عندكم النية لتطهير الرياضة وسلامتكم .

ألووو اخير : الجرأة غلبت النصر دوما ! .. مهزومون هم اولئك الذين لا يرجون الانتصار . (خوسيه يواكيم اولميدو الاكوادوري )

 

110